Álbumáigeguovdilis Emil Kárlsen Riddu Riđđui
Jagis 2019 nammaduvvui Emil Kárlsen Jagi nuorra artistan Riddu Riđđu Festiválas ja beasai dan maŋŋil leat fárus Riddu Sessionsiin, festivála iežas prográmmas nuorra sámi dáiddáriidda. Dál galgá Omasvuona artista leat váldonamman eamiálbmotfestiválas boahtti vuosttašskearruinis, Nagirvárrái.
Emil Kárlsen galgá čuojahit Riddu Riđđu váldolávddis ja lea okta váldoartisttain. Vaikko lea nuorra, de lea Emil Kárlsen háhppehan ollu doaimmahit sihke artistan, teakstačállin, buvttadeaddjin ja dáiddárin. Maŋŋil go čieža jagi lea leamašan teakstačállin ja lávlun Resirkulert-joavkkus, de čalmmustahttá Nagirvárrái Emil Kárlsena vuosttaš álbuma soloartistan.
Emil Kárlsen ráhkada musihka sámegillii, iešlágán jietnagovain maid eat ovdal leat gullan Sámis: Jietnagovva ivdnejuvvon klassihkalaš streaŋgačuojanasain, mas binnáš molssaevttolaš country ja jazza niegadeaddji ládje leat beassan gárvvuhit geasuheaddji popšuoŋaid ja poehtalaš teavsttaid. Beassat váldonamman Riddu Riđđui dadjá ieš Emil leat dego “mánnávuođaniehku mii ollašuvvá, ja dása galgá gal ohcalit buot stuorarumbbuid ja goavdásiid”.
Nugo nu ollu eará mearrasápmelaččatge, de lea Emil ja su veahka váldán ruovttoluotta sámi árbbiset ja identitehtaset. Go son dál vuosttašskearruinis álgá soloartistan, de lea jurdda sámegielat álbumis mii duohtandahkko, mas luođis lea diehttelas sadji. Ollu álbuma lávlagiin lea ovttasbarggu bokte šaddan, earet eará Arktisk Filharmoniijain, Ella Marie Hættain ja badjáneaddji artisttain, Lávriin.
Riddu Riđđu festiválajođiheaddji, Sandra Márjá West, lea rámis go almmuha Emil Kárlsena geasi ávvufestivála váldonamman:
- Lea stuora ášši beassat almmuhit Emil Kárlsena Riddu Riđđu festivála váldonamman. Deaivvadin suinna vuosttaš geardde go lei fárus Riddu Nuorat-prográmmas, min nuoraidprográmmas, moanat jagiid áigi. Son juoigá ja sámásta dakkár diehttelasvuođain mii njuorasmahttá mu. Lea čaffat go mis leat dakkár artisttat Ivguvuona guovllus ja rámidan su mátkki mainna lea ollen dása ahte čállá sámegillii teavsttaid.