Bente Ovedie Skogvang joatká

Lávvardaga cuoŋománu 24. b. dollojuvvui Riddu Riđđu Festivála AS generálačoahkkin. Dalle válljejuvvui Bente Ovedie Skogvang Riddu Riđđu Festivála AS ođđasit stivrrajođiheaddjin áigodahkii 2021 –  2023. Dasa lassin válljejuvvui Maria Løkvoll ođđa stivralahttun.

Bente Ovedie Skogvang giitá generálačoahkkima luohttámuša ovddas, ja illuda láidestit festivála dán jagáš 30 jagi ávvudeamis ja boahtteáigái. Lea stuorra gudni beassat jođihit festivála mii lea nu dehálaš ja mii mearkkaša nu ollu nu ollu olbmuide, ja Riddu Riđđu lea šaddan ásahussan mas lea mearkkašahtti mearkkašupmi lagaš suohkaniidda, regiovdnii, fylkii, Sápmái ja maiddái riikkaidgaskasaččat, dadjá Skogvang. Ahte Riddu Riđđu lea deavdán 30 jagi muitala čielgasit makkár mearkkašupmi festiválas leamaš olugiidda máŋggaid jagiid, ja mii leat nu rámis go min festivála lea guovddáš oassi ealli ja gelddolaš sámi kultursuorggis, muitala Skogvang.

Dattege lea dáid áiggiid hástaleaddji ráhkadit festivála, dadjá Skogvang, ja lea dehálaš balanseret dan ovddasvástádusa mii festiválas lea iežas gussiid ja sámi dáiddáriid dáfus, ja dan ovddasvástádusa mii festiválas lea áimmahuššat njoammuneastadeami ja amas dagahit Olmmáivákki báikegoddái dahje suohkanii dárbbašmeahttun riskka.

Mii goitge jáhkkit ahte mii galgat nagodit goappašiid beliid váldit vuhtii, ja leat sihkkarat ahte mii maiddái 2021:s sáhttit lágidit stuorra sámi kulturvásáhusaid ovddasvástideaddji ja oadjebas rámmaid siskkobealde. Lea diehttelas ahte šaddá veahá earálágan lágideapmi go dat masa festiválaguossit leat hárjánan, muhto mii leat sihkkarat ahte mii maiddái dán jagi nagodat fuolahit buori Riddu Riđđu-vásáhusa, loahpaha Skogvang.

Riddu Riđđu Festivála AS stivrras leat áigodagas 2021 - 2022 čuovvovaš lahtut:

Bente Ovedie Skogvang (stivrrajođiheaddji)
Maria Løkvoll
Magnus Tornensis
Per Ivan Vatne
Kristin Bjørn (nammaduvvon Romssa ja Finnmárkku fylkkasuohkana ovddas)
Jakop Janssønn (nammaduvvon Sámedikki ovddas.)
Jens Kristian Nilsen (nammaduvvon Gáivuona suohkana ovddas)

Jus háliidat eanet kommentáraid, de váldde áinnas oktavuođa stivrrajođiheddjiin Bente Ovedie Skogvangain telefovnna 95 70 44 33 dahje e-poastta bente.skogvang@inn.no bokte.