Ođđa bargit Riddu Riđđus

Riddu Riđđu lea virgádan Stian Pedersena buvttadeaddjin ja Ingrid Brandvika gulahallan-/festiválakoordináhtorin. Soai leaba goappašagat jo olles leavttuin pláneme boahtte jagi festivála fárrolaga earáiguin kantuvrras.

Stian Pedersen lea oahppan prošeaktajođiheaddji dáidda- ja hutkás ealáhusas, ja lea leamašan oassin festiválas iešguđetlágán ámmátlaš rollain jagi 2013 rájes. Son šaddá prošeaktajođiheaddjin buot Riddu Riđđu Festivála OS lágidemiide, ovddasvástádusain várret oassálastiid ja ovdánahttit dáiddalaš prográmma ovttas festiválajođiheddjiin.

«Mu mielas lean mun hui privilegerejuvvon gii beasan bargat Riddu Riđđuin. Oassálastit hábmemis dehálaš gávnnadanbáikki sihke sámi- ja eamiálbmotkultuvrraide lea hirbmat gelddolaš ja mávssolaš. Lean gearggus ođđa hástalusaide ja gearggus váldit buvttadeaddjirolla ovtta máilmmi deháleamos festiválain!» - dadjá Pedersen.

Brandvik lea ovdal bargan gulahallankonsuleantan PEN International olmmošvuoigatvuođaorganisašuvnnas Londonis. Son oažžu ovddasvástádusa ráhkadit festivála gulahallanplána, ja dasa lassin doaimmahit kantuvrra ovttas beaivválaš jođiheddjiin. 

«Lean rámis ja giitevaš go mus lea vejolašvuohta bargat ovttas Riddu Riđđu áŋgiris teamain! Sis ii leat duššo hirpmahuhtti girjás dáiddalaš prográmma, sii maiddái leat njunnošis barggus ovddidit eamiálbmogiid kultuvrraid ja vuoigatvuođaid. Illudan sojiidan jorgulit.» - lohká Brandvik.

Bente O. Skogvang, Riddu Riđđu Festivála OS stivrajođiheaddji, lea hui duhtavaš virgádemiiguin: “Sihke Stian ja Ingrid leaba fágalaččat nannosat ja sudnos lea buorre mokta bargat Riddu Riđđus. Soai dievasmahttiba teama buori ládje ja dieđán ahte soai buktiba ođđa jurdagiid festiválii. Dasa lassin dievasmahttiba goabbat guoibmáseaskka. Stianis lea stuora fierpmádat dán guovllus ja Sámis, dovdá bures Riddu Riđđu ja guovllu nuoraid, ja Ingridis ges lea alla gelbbolašvuohta ja sisriikkalaš ja riikkaidgaskasaš fierpmádat fágasuorggistis. Son lea earet eará čállán masterbarggu vaššás cealkámušain neahtas sápmelaččaid ja eará unnitlohkojoavkkuid vuostá.”