Ráppa ja lossarocka ovttastuvvojit Riddu Riđđus 2021:s

Ailu Valle ja Amoc gávnnadeaba fas ovttas Trio Boogiemen live-joavkkuin alvvalaš ráppa- ja lossarockakonsearttas jagi 2021 Riddu Riđđu festiválas. Artistat luoitiba fargga áibbas varas álbuma, maŋŋil go leaba ovttasbargan superbuvttadeddjiiguin Uyarakqiin ja Juan Muteniaciin.

Fánsat Riddu Riđđus besset illudit setlistui mas leat áibbas ođđa lávlagat lassin dovddus ja ráhkis klassihkkáriidda, maid Ailu Valle ja Amoc ealáskahttiba Ridduguolbanis ovttas Trio Boogiemen joavkkuin, man Oula Guttorm, Juho Kiviniemi ja Patrik Fält dahket.

Ráppaartista Ailu Valle lea bures beaggán iešlágán musihkalaš dovddasteamistis, mas hiphop ja davvisámegiella leat guovddážis. Valle lea almmuhan golbma soloálbuma ja lea leamaš fárus ollu prošeavttain. Jagis 2020 oaččui bálkkašumi buoremus teakstačállin/komponistan Sámi Music Awardsas.

Amoc lea vuosttaš artista gii ráppii anárašgillii ja lea badjel 20 jagi buktán ráppamusihka mii soaigá sivu. Čilge šáŋŋeris horror-ráppan, ja lea beaggán go ráhkada dovdduide čuohcci musihkalaš máilmmi gos lávlagiid vuođđun leat muitalusat, sámi mytologiija ja ilgadis oruhat.

Riddu Riđđu festiválajođiheaddji, Sandra Márjá West, cealká dáinna lágiin dán mánu nuppi luoitima birra:

“Ailu Valle ja Amoc leaba guokte artista geat leaba mearkkašan ollu sámi ráppai, ja leaba guovtti iešguđetlágán sámegiela ovdavázzit. Sudnos lávejit álohii buorit konsearttat ja illudan oaidnit sudno Riddu Lávddis.”

FUOM! Ovdagihtii oastán bileahtaid ovddas oažžu ruđa máhcahuvvot jus festivála ii lágiduvvo.