Arnhem Landa ođđa prinsa Riddu Riđđui
Guovvamánus liekkadii Baker Boy guldaleddjiid Sydneys ovdal máilmminásti 50 Centa, dán geasi čuojaha son vuosttaš riikkaidgaskasaš konsearttas Riddu Riđđus!
Ođđa prinsan leat Davvi-Australias gohčodišgoahtán ráppára Baker Boya. Son lea johtilit dovddusin šaddan máŋggagielat dáiddárin, gii rasttilda rájiid go bargá ráppemiin, dánsumiin, neaktimiin ja graffittiin, ja son ovddasta ruovttuguovllus ođđa ja gelddolaš vugiin.
Danzal Baker aka Baker Boy (21) lea riegádan ja bajásšaddan Arnhem Landas, gos maiddái beakkálmasat nugo Yothu Yindi ja Gurrumul bohtet.
Festiválajođiheaddji Karoline Trollvik dadjá; - Midjiide, Eurohpá stuorimus eamiálbmotfestiválan, lea dehálaš atnit festivála lávdin gos máilmmi nuorra eamiálbmottaleanttaid čalmmustahttit. Mis lea dehálaš bargu áicat daid artisttaid geat eai vel leat ožžon dan fuomášumi maid ánssášit, ja leat vissásat ahte Baker Boy oažžu ollu ođđa rámideddjiid go deaivvada Riddu Riđđu sáhkkis ja musihkkaváibmilis gussiiguin.
Árrat bijai Baker Boy alcces mihtu šaddat vuosttaš Yolngu Matha-gielat ráppárin. Yolngu Matha leage su eatnigiella. «Cloud 9» nammasaš vuosttašsiŋŋeliinnis olahii dán mihtu ja maiddái hirbmat beaggima. Baker Boy lea ožžon ollu čuojahansaji rádios ja Australia stuorimus musihkkakanála, Tirple J, lea sakka rámidan su. Guovvamánus dán jagi liekkadii son ráppemiinnis guldaleddjiid ovdal 50 Centa ja Dizzee Rascala, čuojahemiin Sydneys ja Melbournes.
Su ođđaseamos siŋŋel, «Marryuna», mii Yolngu Matha-gillii lea doaba mii čilge friddja dánsuma, lea ráhkaduvvon geassefestiválaide ávvudeapmin. - Riddu Riđđui boahtá son njeljiin dánsejeddjiin, Yidakiin/didgeridooin ja doallá vel smávit konsearttaža Club Lávus. Baker Boy dáidá eahpitkeahttá boktit albma dánsunmovtta gaskaijabeaivvádaga čuovggas dán jagi Riddu Riđđus, loahpaha duhtavaš festiválajođiheaddji.
