Buolli-áigeguovdilis Emil Kárlsen 2024 Riddui
Dušše moadde beaivvi áigi čuojahii musihkar ja neavttár Emil Kárlsen konsearttaid mat ledje spagga dievva Reykjavikas dovddus Iceland Airwaves festiválas. Multidáiddáris Omasvuonas eret Romssas lea ollu mii dáhpáhuvvá dál; Son lea Sámedikki Giellaloktenbálkkašumi varas vuoiti, lea neavttárlisttus Disney+ ráiddus Koke Bjørn mii boahtá 2024 čavčča, ja odne lea čielgan ahte son maiddái čuojaha jagi 2024 Riddu Riđđu festiválas.
Emil Kárlsen lea hirpmahuhtti oanehis áiggis dovddahan iežas dállodoallonamman guovllus. Jagis 2019 nammaduvvui Dán jagi nuorra dáiddárin Riddu Riđđus, ja artista lea dan rájes čuojahan festiválas sihke oassin ovddeš Resirkulert joavkkus ja soloartistan – álohii stuora illun guldaleddjiide.
Emil Kárlsen čállá musihka davvisámegillii, muhto soundain mii ii ovdal leat gullon Sámis: ođđamállet joavkovuođuin nuohtalaš vokálaiguin ja poehtalaš teavsttaiguin, giessaluvvon klassihkalaš dávgečuojanasaid ja iešlágan jietnauniverssaid sisa. Vaikko lea dušše 25 jagi de lea Kárlsen juo šaddan dovddusin musihkarin, lávllačállin, buvttadeaddjin, artistan ja neavttárin. Su vuosttaš albuma «Nagirvárrái» fátmmasta ovttasbarggu sihke Arktis Filharmoniijain ja dovddus sámi artisttaiguin nugo Lávriin, Katarina Barrukiin ja Hildá Länsmaniin, lassin guossečuojahemiid Ella Marie Hætta Isakseniin (ISÁK joavkkus) ja Áidnain.
Festiválajođiheaddji Sajje Solbakk dušše rámida bivnnut artistta:
Lei nu somá vásihit responssa maid Emil Kárlsen oaččui Iceland Airwavesas! Máhcaheapmi guldaleddjiin lei ahte su musihkka deaivá ja njuorasmahttá vugiin maid eai nu gallis nagot. Emil lea fuomášan movt ráhkadit musihka mii lea rašši, lahka, movttiidahtti ja geasuheaddji oktanaga. Geahččit dovdet ahte son loaktá lávdde nalde ja sus lea rámálmas musihkarjoavku mat geasuhit olbmuid. Ovttas hábmejit sii magiija, ja Riddu-guossit eai ánssáš maidege heajut!