Dakkár šaddá dán jagi Riddu Riđđu festivála – festivála 500 olbmui
Riddu Riđđu 2021 šaddá earálágán festiválan, mii guovdilastá alla dását sámi dáidaga ávvudeami dorvvolaš birrasis. Njoammuneastadeami dihte šluhttet bearašcampa ja festiválacampa, ja guosselohku ráddjejuvvo 500 olbmui.
Mii háliidit gávdnat oadjebas vuogi čoahkkanit ja leat danin ferten veaháš heivehemiid dahkat. Riddu Riđđu lea čuovgadoardnan sámi kultuvrii ja lea Sámi deháleamos festivála. Mii dovdat danin stuora ovddasvástádusa ovddidit sámi dáidaga ja hábmet sámi gávnnadanbáikkiid. Háliidit lágidit unnibuš festivála baicca go šluhttet olles festivála, dadjá festiválajođiheaddji Sandra Márjá West.
Bileahttarefušuvdna
Mii leat rámis go sáhttit fállat prográmma mas lea alla dássi. Ipmirdit ahte go festiválacampa ii šatta, de oallugiin ii leat vejolašvuohta boahtit, lohka festiválajođiheaddji Sandra Márjá West. -Buohkat geat leat oastán bileahta ožžot e-boasttas refušuvdnafálaldaga!
Násttit ja ođđa rámálmasat girjás prográmmas
Riddu Riđđu lágideamit juhkkojuvvojit dán jagi olles festiválavahkkui. Bivnnut Mánáidfestivála ja nuoraidprográmma Riddu Nuorat lágiduvvojit mánnodagas suoidnemánu 12.b. gitta gaskavahkkui suoidnemánu 14.b. Riddu Riđđu festivála lágiduvvo duorastagas suoidnemánu 15.b. lávvordahkii suoidnemánu 17.b.
Mánáidfestiválii leat sierra bileahtat. Oastá bileahta juohke mánnái gii oassálastá, ja váhnemiidda/ovddasteddjiide lea nuvttá čuovvut máná doaimmain ja bearaščájálmasain. Muđui leat Mánáidfestiválas, nugo vierru leage, gelddolaš doaimmat maid vuođđun lea mearrasámi kultuvra. Dán jagi besset mánát earet eará ráhkadit guollejielli, juoigat, gullat máidnasiid, ođđasit hábmet biktasiid ja leat fárus bargobájis mánáid vuoigatvuođaid birra.
Dán jagi prográmma fállá ollu ođđabuvttademiid. Stand-up-prošeakta Reaškkas oamasta fas definerenfámu das mii sámi leaikkastallan lea. Sámi leaikkastallantaleanttain lea Sámi leaikkastallandronnet Trine Lise Olsen ofelažžan. Dán jagi nuorra dáiddár-guovttos Gáddjá ja Biret Haarla ovdanbuktiba čájálmasa masa inuihtta-elektronika-čottalávlunjoavku Silla + Rise lea ráhkadan musihka. Emil Kárlsen luoitá vuosttašskearrus Nagirvárrái beaktilis konsearttain. Muđui besset guossit vásihit oiddohiid nugo ISÁK ja Felgen orkestera, ja ođđa joavkku Ozas mas leaba oappážagat Risten Anine ja Sara Marielle Gaup.
Riddu Riđđu fállá nugo álo govda prográmma mas leat konsearttat váldolávddis, čájálmasat, filbmaprográmma, girjjálašvuohta, dáiddačájáhus, márkan, seminárat ja digaštallamat.
Ođas dán jagi
Njoammuneastadeami geažil fertejit guossit várret saji buot prográmmaosiide mat leat Nisga’a-viesus ja kulturlanjas. Dát gusto: UIT-seminárii, Nordlys-seminárii, girjjálaš ságastallamii: Odd Marakatt Sivertsen ja Irene Larsen, čájálmassii Etniid ulloliinnit, Riddu Sessionsii, Reaškkasii ja dáiddačájáhusa rahpamii.
Saji lea vejolaš várret mánnodaga suoidnemánu 12.b. diibmu 12.00 rájes. Bileahttaoastit vuostáiváldet dieđuid dan birra e-boastta bokte. Dán jagi ferte gussiin leat festiválabileahtta jus galget márkanii beassat.
FUOM! Prográmmarievdadeami geažil Gájanas ii boađe ja Amoc + Ailu Valle sirdojuvvo jagi 2022 Riddu Riđđu festiválii.