Dán jagáš Buošši-vuoitit leaba Ruth ja Per Larsen
Davvi-Romssas “buošši” lea gudnenamahus muhtumiidda geat leat áŋgirat, barggánat, jálut ja duostilat. Leat buošši lea stuora komplemeanta, muhto dan ferte ánssášit. Eamiálbmotfestivála Riddu Riđđu ja Davviálbmogiid Guovddáš leat ovttas ásahan Buošši-bálkkašumi gudnin bargi ja duostilis olbmuide dahje servviide geat leat bidjan erenoamáš návccaid čalmmustahttit mearrasámi giela ja kultuvrra.
Árvvoštallangoddi oaččui máŋga nana nominašuvnna, muhto dán jagi bálkkašumi vuoitit ledje erenomáš buorit. Ruth ja Per Larsen leaba áŋgiris sápmelaččat geat máŋggaid jagiid leaba bargan mearrasámi kultuvrra, giela ja historjjá gáhttemiin. Soai ássaba Skárfvákkis - vuotnagilis Gáivuona suohkanis mas lea guhkes sámi historjá. Ovttas Skardalen Bygde- og Kulturlag:in leaba dát guovttos leamaš mielde seailluheamen mearrasámi kultuvrra ja birrasa gilážis.
Guossolas bálkkašumi vuoitit leaba vuostáiváldán lohkameahttun gussiid geat leat beassan oahpásmuvvat návehiin ja gođiiguin, vákkiin ja fiervvás. Ođasmahttojuvvon návehis lea bárra lágidan nu ahte doppe sáhttá viidáseappo fievrridit gili kulturhistorjjá. Doppe guossit besset áinnas návddašit mearrasámi biepmu ja gullat muitalusaid dahje sámi lávlagiid ja sálmmaid. Fiervvás leat máŋga ovddeštuvvon návsttet gos beassá oahpásmuvvat guollebivdiid eallimiin. Skárfvákkis leat máŋgačuođi sámi báikenama, maid Per ja Ruth leaba leamašan mielde duođašteamen ja galbemin.
Ruth ja Piera leaba áŋgirat gáhttet gili erenoamáš kultureanadaga. Soai leaba maid sihkkarastán dan, ahte árbevirolaš diehtu sirdašuvvá boahtte bulvii. Juohke geasi vuostáiváldiba soai nuoraid geain lea gullevašvuohta gillái, ja sii ohppet háset láju ja guohtuneatnamiid ja divodit visttiid.
Bárra lea maid mielde Gáivuona sámi lávlunjoavkkus, Ruth goarru Ivgugávttid buot bearrašmielláhttuid geat dan dárbbašit ja lea áŋgir Olmmáivákki duodjesearvvis ja Romssa Sámiid Duodje searvvis.
Loga eambbo Skárfvákki kultureanadaga ja bálkkašumi vuoitiid birra dás: