Dán jagi nuorra dáiddár lea Márjá Karlsen
Mearrasámi Márjá Karlsen lea 23 jahkásaš ja bajásšaddan Romssas. Bajásšattadettiin ii lean sámi kultuvra su eallimis, muhto lea váldán dan ruovttoluotta ja duodji lea su deháleamos reaidu. Dadjá ahte duodji diktá su fysalaččat doallat dan mii sus lea váldon, ja ahte dat lea su barggu jođihanfápmu.
“Lean jáhkkemeahttun giitevaš go lean Dán jagi nuorra dáiddár. Dát addá munnje vejolašvuođa čatnat nannoseappot báttiid Sápmái. Illudan sakka jahkái mii boahtá!” dadjá varas Dán jagi nuorra dáiddár, Márjá Karlsen.
Karlsen vázzá maŋemus jagi Oslo dáiddaallaskuvllas (KHiO), gos lohká bachelora Medium og materialbasert kunst-fáttás. Son gullá tekstiilaossodahkii ja lea guokte maŋemus jagi guovdilastán gođđima. Son lea čiekŋudan rátno- ja gákkesgođđimii. Son lea huksen alcces gođđinmuoraid rátnogođđimii ja botnán alcces láiggi sihke čuožžamiidda ja dáidneláigin. Dát lea sámi árbevierru mii ain lea nanus Gáivuonas. Riddu Riđđui buktá son prošeavtta “Ávnnas muitá”. Son háliida bovdet festiválaálbmoga duhppet gággása suinna fárrolaga Ridduguolbanis.
“Go duddjo, de bargá historjjáiguin. Lea iežas ja bearrašis historjá. Dat lea máttaráhkuideamet historjját, ja dat leat maŋisbohttiideamet historjját. Smávva bienat, nugo čuoika mii čuggesta go lea olgun gođđime, sáhttá leat seamma dehálaš go stuorit muitalusat kolonialismmas.” lohká Márjá Karlsen.
Jurys leat leamašan Dine Fenger Lynge, Piera Heaika Muotka, Eva Fjellheim, Stian Pedersen ja Sandra Márjá West. Jury hirpmahuvai go lei nu alla dássi ohcciin Dán jagi nuorra dáiddár sajádahkii, ja lea movttiidahtton issoras hábmenfámus mii lea nuorra sámi dáiddáriin.
Festiválajođiheaddji Sandra Márjá West lea čeavlái go beassá nammadit Márjá Karlsena Dán jagi nuorra dáiddárin: “Vuosttaš geardde lea mis duojár Dán jagi nuorra dáiddárin. Márjá Karlsen lea gelddolaš dáiddár, guhte deattuha fearániid muitaleami ja kollektiivva mii duodjebuktaga duohken lea. Son lea háhkan máhtu sihke Oslo dáiddaallaskuvllas ja mearrasámi árbedihttiin.”
Jagi nuorra dáiddár lea ortnet mii juohke jagi nammada nuorra sámi dáiddára ovdanbuktit dáiddalašvuođas Riddu Riđđu festiválaprográmma bokte ja eará lágidemiin maid Riddu Riđđu lea fárus lágideame dan jagi. Nammadeapmi addá, lassin 25.000 ruvdnosaš stipendii, vejolašvuođa orodit Lásságámmis, Áillohačča dáiddárviesus. Dán jagi nuorra dáiddár/Riddu Sessions-prográmma čađahuvvo Talent Norge, Samfunnsløftet ja Sámedikki doarjagin.