Electric Pow Wow Riddogiettis
Gávpotolbmot “A Tribe Called Red” eai dáhto leat dušše DJ’at, sis lea maiddái mielde VJ. Video atná maiddái sápmelaš Elle Márjá Eira, gii dál lea gárvvis dán jagá Riddu Riđđu festiválii.
Audiovisuála konsearta
Ovttas filbmadahkkiin Ken-Are Bongoin lea Elle Márjá Eira ráhkadan konseartahámi mii fállá guldaleddjiide juoidá earenoamáža. Čeahpes ovttastahttimiin buori filmma ja čáppa musihka gaskkas bovdejuvvojit guldaleaddjit mielde Eira eallimii, mas boazodoallu ja gaskavuohta lundui leat áibbas guovddážis. Elle Márjá Eira dadjá ieš ahte dat mii addá sutnje miela ráhkadit musihka lea sávaldat ahte seailluhit divrras árbevieru, ja dan kultuvrralaš ja gielalaš riggodaga.
- Elle Márjá lea artista gii váldá stuorra ovddasvástádusa dáidagiinnis, ja mii dárbbašit su lágán artisttaid, dadjá festiválahoavda Kirsti Lervoll. Eira almmuha beassážiid áigge iežas vuosttaš skearru, man namma lea "Iđitsilba".
Electric Pow Wow
Video lea deaŧalaš veahkkeneavvu maiddai First Nation-jovkui mii buktár Electric Pow Wow Riddogieddái. Ja Lervoll ii bala gohčodeames sin dán jagá buoremussan. A Tribe Called Red leat ožžon stuorra fuomášumi riikkaidgaskasaččat iežaset earenoamáš seaguhusain, mas video lea seammá guovddážis go ieš musihkka. ” A Tribe Called Red, geat orrot Canada oaivegávpogis, leat álgoálbmotmusihka ođđaseamus fuomášupmi. Sis lea ođđaáigásaš ovdanbuktin, muhto leat nagadan seaguhit árbevirolaš pow wow– musihka urbána elektronikain. Mis galgá njulgestaga leat pow wow Riddu-lávddi ovddas, dadjá Lervoll.
Boahttevaš násti
Riddu Riđu 2012 nuorra dáiddárin son lihkastahtii guldaleddjiid, ja dan maŋŋá leat áššit ovdánan iešalddiset nuorra umesápmelaš nissonii Katarina Barrukii. Son leamaš sihke Márkomeanuin ja Davvi-Norgga Riemuin, ja 19-jahkásažžan sus leat jo ollu čuovvuleaddjit Sámis. –Son lea dego hárvenaš bearal. Barruk ánssáša buot fuomášumi maid sáhteš oažžut, dadjá Lervoll, ja bivdá buohkaid bidjat muitui dán jagá Riddu Riđu-festivála dáhtomiid, suoidnemánu 9.-13.b.