Felgen Orkester ja Solju Riddui
Felgen Orkester
Felgen Orkester lea sámi pop/rock/folk-joavku mii ráhkada ilolaš ja šuoŋalaš lávlagiid. Teavsttat leat davvisámegillii ja daid sáhttá govvidit fáttain gullevaččat lundui, ráhkisvuhtii, eallinfilosofiijai ja abstrákta dilálašvuođaide. Juoigan lea maiddái guovddáš oassi jietnagovas. Joavkkus leat guhtta kárášjohkalačča, eatnasat vilbeležagat, muhtimat vieljažagat ja earát fulkkežagat. Joavku lea almmuhan ovtta EP ja guokte olles skearru ja ollu siŋŋeliid. Felgen Orkesteris ráhkistit live čuojahit ja musihkaineaset fillejitge dávjá guldaleddjiid sihke lávlut ja juoigat singuin fárrolaga.
Solju
Solju-joavkkus leaba Hilda Länsman ja su eadni Ulla Pirttijärvi-Länsman. Etneš guovttos ráhkadeaba musihka mas doajáhallaba gaskal sámi musihkkavieru ja ođđamállet hámi. 25-jahkásaš Hilda lea bajásšaddan juoigamiin, su eatni atnet oktan beakkáneamos sámi juigiin. Hilda lea earet eará ovttasbargan Niillas Holmbergain ja Ailu Valliin. Juo 20-jahkásažžan almmuhii Ulla vuosttaš skearrus. Lea čuojahan akto ja maiddái leamaš oassin konstellašuvnnain nugo “Transjoik” nammasaš joavkkus ovttas Frode Fjellheimain. Son lea maiddái bargan Romssa fylkajuoigin.