Jaskesábi reggae Riddu Riđus
Dán geasi beasat dánsut jaskesábi reggae Riddu Riđus.
Dán jagi boahtá reggae/roots bánda Katchafire Ođđa Seelánddas. Katchafire lea dovddus ja hárjánan joavku eatnanspáppa máttit beali reggaemáimmis ja lea máŋggaid jagiid čuojahan festiválain ovttas eará dovddus profilaiguin dego The Wailers, UB 40, Shaggy ja Lauryn Hill. Festiválahoavda Karoline Trollvik muitala, ahte Katchafire profilere iežas ollásit maori joavkun. ”Reggae lea dakkár šaŋŋer, mas lea stuorra dadjamuš Ođđa Seelánddas, earenoamážit maori/polynesalaš birrasis”, dadjá Trollvik. «Katchafire lahtut deattuhit iežaset eamiálbmotgullevašvuođa, ja buktet ovdan iežaset buori dovddu ja eaktivuođa».
« Reggae/roots gieđahallá olu ráhkisvuođa ja gudnejahttima, ja dát vuhtto maiddái Katchafire senaovdanbuktimis. Bánda lea dovddus das, ahte sin čuojahanillu álkket njoammu maiddái álbmogii. Vissásit olles Ridduguolbba moddjá govdadit ja livžžoda dán geažil, loahpaha festiválahoavda.
Musihkkaliŋkkat:
https://itunes.apple.com/us/album/best-so-far/id630270419
https://www.youtube.com/watch?v=jH3TiUbeas0