Kanadalaš fápmobuktu geasi festiválii!

Soul, blues ja rock mas lea Nunavuta davit duoddariid čiekŋalasa gájanas, dat lea maid oažžut The Trade Offs joavkkus. Joavku buktá árktalaš soul ja blues universála fáttáiguin nugo čuovggas, seavdnjadasas, lagasvuođas ja isolašuvnnas, ja teavsttaineaset atnet seaguhusa inukittutas  ja eŋgelasgielas. The Trade Offs lea dávjá oaidnimis lávddiin miehtá Kanada, ja lea maiddái dahkan sukseassa olgoriikkas, maŋemus Reykjavikas Iceland Airwaves festiválas 2023:s. 

Njunušolmmái Josh Qaumariaqsas ii leat dušše čiekŋalis ja roagga jietna, son lea njuolgut veaháš dakkáraš gitárasáŋgár. Su álbmás jietna ja virtuosa gitáračuojaheapmi suddá ovttas Jeff Maurice silolaš jietnaduovdagiin stuorát ovttadahkan, ja dása ožžot gal Riddu-guossit roahkka illudit. Lehket gergosat ráhkásmuvvat Nunavuta árktalaš soulii! 

Bálkkašumiid vuoiti kanadalaš šuokŋadahkki Jeremy Dutcher máhccá maiddái Riddu-guolbanii 2024:s maŋŋel go vuohččan lei festivála lávdde nalde 2019:s. 

Jeremy Dutcher lea tenora, šuokŋadahkki, aktivista, etnomusihkkologa ja Neqotkuk (Tobique First Nation) lahttu Nuorta-Kanadas eret. Son atná árjjalaččat First Nation-ruohttasiiddis musihkastis, ja lea ráhkadan musihkalaš hámi mii njuolgut lea oalle sierralunddot. 

Dat lea seaguhus neo-klassihkalaš, jazz- ja popmusihkas. Dutchera eahpitkeahtes attáldat ja sierralunddot musihkkahápmi lea earet eará čuoččáldahttán ovttasbargguid ikonalaš artisttaiguin nugo Yo-Yo Main ja Beverly Glenn Copelandiin.

Oaččui riikkaidgaskasaš dohkkeheami Wolastoqiyik Lintuwakonawá (2018) álbuma ovddas, vuittii Polaris Music Prize 2018:s ja «Indigenous Music Album of the Year» JUNO Awardsiin 2019:s. Dutcher galleda dávjá máilmmi stuorámus konseartalanjaid ja son lea maiddái leamaš mielde National Public Radio konseartaráiddus, Tiny Desk, ja leamaš oassin Canada's Drag Race duopmárjoavkkus. 

Riddu Riđđu lea hui movttet ovdandivvut The Trade-Offs ja Jeremy Dutchera dán jagi festiválii, ja Riddu Riđđu festiválajođiheaddji Sajje Solbakk mielas lea oavdu beassat muitalit geat bohtet:  

“Go The Trade Offs loaiddastit Riddu Lávdái de ii leat eará go návddašit. Dušše joavkku njunušolbmá Josh Qaumariaqsa nanu jiena ja gaskkustanattáldaga dihte gánnáha vásihit dán, ja ovttas olles joavkkuin lea láhččon albma nunavutalaš fápmočájeheapmái! Dutcher buktá miellagiddevaš dáiddalaš univearssa fámolaš vokálain, mas Wolastoq First Nation-ruohttasat ovdanbohtet sihke šuoŋas ja sániin. Lávkkastis lea sus fárus áibbas varas álbuma – ii leat eará go illudit geasi konsertii!”