Lásságámmi Jagi nuorra dáiddár

Riddu Riđđu festivála sávvá beassat láhčit dili vai nuorra sámi dáiddárat galget sáhttit ovdánahttit iežaset attáldagaid ja vai dat fuomášuvvo sisriikkalaččat ja gaskariikkalaččat. 90-logu loahpa rájes lea nammaduvvon nuorra, sámi dáiddár “Jagi nuorra dáiddárin”. Sii geat leat nammaduvvon danin leat buohkat leamaš čeahpes dáiddára iešguđetlágán dáiddasuorggis, earret eará dáidagis, poesiijas, filmmas, hábmemis ja dánsumis. Okta oassin dán nammadeamis lea ahte nuorra dáiddár beassá orrut Lásságámmis.

Vuođđudusas Lásságámmis ja Riddu Riđđu festiválas lea sierra ovttasbargošiehtadus mii lotnolasat galgá nannet goabbat guoimmiska doaimma ja veahkkálaga ovdánahttit sámi- ja álgoálbmogiid dáidagiid ja kultuvrra Áillohačča, Nils Aslak Valkeapää’s, vuoiŋŋas.

Festiválajođiheaddji, Karoline Trollvik, dadjá čuovvovaččat ovttasbarggu gaskal festivála ja vuođđudusa birra ná: “ Ovttasbargu min gaskkas lea mávssolaš festiválii, Lásságámmii ja  earenoamážiid sámi kultuvrii. Áillohaš lei okta min áiggi stuorimus dáiddáriin, ja bargu su nama beaggimin lea mávssolaš. Mii leat rámis go sáhttit fállat min nuorra dáiddáriidda orruma su ruovttus, ja sávvat ahte dat sáhttá leat inspirašuvdnan viidásit dáiddalaš ovdáneapmái”.

Guovvamánu 8.beaivvi fárre Elina Waage Mikalsen Lásságámmii. Dás muitala Elina iežas birra ja su jurdagiid iežas orruma ektui ná:

Mu namma lea Elina Waage Mikalsen, lean Tromssas eret ja lean 24 jahkásaš. Orun dál Gávvalvágis, gos váccán dáidda- ja filbmafágaskuvlla. Geasset 2015 válljejuvvojin jagi nuorra dáiddáriin Riddu Riđus, ja lean sin bokte ožžon vejolašvuođa orrut Lásságámmis.

Mus lea viiddis bargoduogáš, ja barggan sihke teavsttain ja govain, bácciin ja musihkain. Skuvllas gos dál váccán, lea maid rievdame fágaskuvla allaskuvlan, mas mihttu lea šaddat oahppu “lihkadeaddji govaiguin”. Doaivvun dan leat leamaš mávssolaš mu bargguide, go dovddan iežan leat dáidaga ja filmma ráji alde, ja mu mielas lea gelddolaš bargat videoin ođđa vugiid mielde.

Go Lásságámmis orun, de lean jurddašan  bargat iežan musihkain, čállit teavsttaid ja čuojahit daid sisa. Lean lávlu ovtta joavkkus man namma lea Blood Forest Family, ja dasa lassin lea mus sierra prošeakta, mas barggan jienain ja “looping’ain”. Doaivvun munnje šaddá hui ávkkálažžan doppe orrut, go lean hui bahá vuorjašuvvat, ja dárbbašan ahte lea jaskat mu birrasis go musihkain galggan bargat. De vel illudan vázzit tuvrraid ja sávdnjet!