Luohti, Telecaster ja myhtalaš-lyralaš máilbmi Riddu Riđus

Son lea čuojahan Dronnet Sonjai sámi paviljoŋŋa rahpamis Venetsiabiennálas diibmá, ja čuojahan soames háviid maid Riddu Riđu publikummii nuppiid olbmuid prošeavttaid oktavuođas. Dán gease máhccá Lávre Riddu Riđđui iežas prošeavttain, ja lohpida varas šuoŋaid iežas guhkká vurdojuvvon debuhta-álbumas. 

Lávre lea nuorra sámi artista, juoigi ja musihkkár, ja lea Guovdageainnus eret. Fárrolágaid árvvusadnon musihkkáriid nástejoavkkuin, ja gelddolaš visuála showain, guorahallá Lávre sámi musihkkamáilmmi ođđa impulssaid.

Lávres lea leamaš miehtebiegga musihkainis maŋimuš jagiid. Jagis 2021 son vuittii Sámi Grand Prix ovttas Hildá Länsmaniin, ja seamma jagi almmustuvai maid rámiiduvvon ovttasbargoálbuma "Nagirvárrái" fárrolaga Emil Kárlseniin. Dál Lávre boahtá Riddu Riđđui háhkat mágihkalaš ilmmi imaštallamiin ja musikálalaš suokkardallamiin.

Konsearta lea vuosttas smáhkkabihttá debuhttaálbmumis mii almmuhuvvo čakčat, ja lea mátkki čađa áššiid, mat dávjá leat čihkkojuvvon čáhcegierraga vuolábeallái; sihke sus alddas ja sámi kultuvrras. Teavsttat dovddahit nuorra dievddu jurdagiid ja miellagovaid, ja daid vuolggasadjin leat dološ luđiid metaforalaš lyrihkka. Musihkka lea čoakkáldat ođđa luđiin, luohtelávlagiin ja árbevirolaš luđiid ođđa heivehusain ja veršuvnnain.

Bileahttat Riddu Riđđu festiválii 2023 leat dál vuovdimassii neahttačujuhusas riddu.no. Ovdalis lea festivála almmuhan dáid artisttaid dán geasi prográmmii: Ana Tijoux, Resirkulert, Katarina Barruk ja Manne.