Mari Boine Riddui Riđđui 2024s
Guovtti mánu áigi bohte guossit miehtá máilmmi Gáivuona suohkanii Davvi-Romssas oassálastit Eurohpá stuorámus álgoálbmotfestiválas. Riddu Riđđu festivála leat dál almmuhan vuosttaš artistta gii boahtá Riddu Riđđui boahtte geasi. Festiválajođiheaddji Sajje Solbakk juogada otne ahte buohkat geat niegadit vásihit Mari Boine Riddu-lávddis, ožžot vejolašvuođa Riddu Riđđus 2024:is. Dasa lassin lea maiddái bileahttavuovdin rahppon, ja vuosttaš 100 festiválapássa vuvdojuvvojit hálbbiduvvon haddái.
Vuosttaš geardde go Mari čuojahii Gáivuonas lei 1989, ja dan rájes lea máŋgii čuojahan Riddu Riđus. Boine lea ovdal lohkan ahte son lea ruovttus go boahtá Gáivutnii.
Go Mari Boine álggii artistan 80-logu álggus, de lei su suhttu vuolggaheaddjin. Dan rájes son lea movttiidahttán álgoálbmotartisttaid miehtá máilmmi vuostálastit badjelgeahččama, koloniserema ja vearrivuođa.
"Dalle go muitalan iežan persovnnalaš historjjá sápmelažžan, de dovddan ahte mun juogadan oasi iežan álbmoga historjjás" Mari Boine.
Mari Boine musihkka lea garrasit čadnojuvvon sámi kulturárbái, seammás go son viežžá inspirašuvnna iešguđetlágan kultuvrrain ja šaŋŋeriin. Árbevirolaš ja ođđaáigásaš čatnasit sihke jazzii, álbmotmusihkkii, rockii ja popii. Su buvttadeamit leat dovdosat meahttá máilmmi ja son lea ožžon ollu bálkkašumiid barggustis ovddas. 2018:s son oaččui Spellemanns gudnebálkkašumi.
Áŋgiris festiválajođiheaddji kommentere otnáš almmuhusa:
- Mari Boine lea ikona ja pionéra Sámis, ja ii leat ge áibbas amas su gohčodit Sámi Dronnegiin. Go Mari lávke lávdái de nagoda olles publika fátmmastit erenoamáš vugiin. Ain dán beaivái de jurddašalan su maŋemuš Riddu-konseartta birra. Olmmoš ferte su vásihit!