Niehkobarggu fasken
Riddu Riđđu ođđa festiválajođiheaddjis lea fárustis eamiálbmotfierpmádat miehtá máilmmi, nanu vásáhusat politihkas ja jođiheamis, ja vuođđun sus lea mearrasápmelašvuohta. Sandra Márjá West (27) álgá Riddu Riđđu ođđa festiválajođiheaddjin.
Máŋggabealat hárjáneapmi
West lea dáid áiggiid gollečeahppin oahppamin ja váldá sváinnasreivve 2018 giđa, ja son lea NSR:a sámediggejoavkku parlamentáralaš nubbijođiheaddji. West hupmá davvisámegiela, son lea áŋgiruššan sámi- ja eamiálbmotdáidaga ovddas jo dan rájes go lei beallešattot, ja lea maiddái lohkan ruoššagiela. «Sandra ollu jagiid vásáhusat organisašuvdnabargguin ja eaktodáhtolašvuođas, earet eará Riddu Riđđus, leat su bures ráhkkanahttán jođihit ja movttiidahttit Riddu Riđđu bargogotti, ja lean vissis ahte son lea rievttes olmmoš jođihit festivála ovddasguvlui» dadjá hirbmat duhtavaš stivrajođiheaddji, Christina Henriksen. West galgá dán geasi festiválas oažžut oahpahusa heaiti jođiheaddji, Karoline Trollvika, fárus, ovdalgo ieš joatká dáiddalaš jođiheami čakčamánu 1.b. 2018 rájes.
Hirbmat beroštupmi
West lea bajásšaddan Gáivuonas ja lea ollu gesiid leamašan oassin festiválabargogottis. Son oassálasttii ja jođihii ollu jagiid festivála goatnjidis nuoraidáŋgiruššama, mii láhčá deaivvadanbáikki miehtá máilmmi eamiálbmotnuoraide. Dálá festiválajođiheaddji Trollvik rámiida maŋisboahttis; «Sandra lea máŋga jagi beroštan sámi- ja eamiálbmotdáidagis, ja dat, aktan su politihkalaš rahčamušaiguin, nanusmahttá su buori ládje boahtteáigái, seammásgo son lea oassin mearrasámi kultuvrras ja maiddái Gáivuonas. Son eahpitkeahttá áigu loktet min mávssolaš ja dehálaš festivála ođđa dásiide!»
Niehkobargu
West dadjá ieš ahte illuda hirbmosit álgit bargui ja ovttasbargat Riddu Riđđu rámálmas bargogottiin, ja bargat festiválas mainna lea bajásšaddan. Ja ođđa festiválajođiheaddji áibbas čielgasit oaivvilda ahte lea fasken niehkobarggus; «Olles eallinagistan lea Riddu Riđđu mearkkašan nu issoras ollu munnje, nuorra mearrasápmelažžan, ja lean oaidnán makkár mearkkašupmi festiválas lea leamašan guovllu mearrasápmelaččaid rámisvuhtii. Mun háliidan váldit ovddasvástádusa joatkit jođihit ja ovddidit festivála. Festiválas lea stuora servvodatovddasvástádus –addit sámi rámisvuođa dálá ja boahttevaš buolvvaide. Riddu Riđđu lea addán munnje ollu ja dál lean gearggus máhccat ruoktot ja addit juoidá ruovttoluotta»