Northern Soul guoimmuha Riddu Riđus

Northern Soul joavku guoimmuha boahtte geasi ruovttubáikkis, Riddu Riđđu festiválas. – Dasa moai illudetne sakka, dadjaba Simone Grøtte ja Herman Rundberg.

Northern Soul lea joavkku namma mas Simone Grøtte ja Herman Rundberg čuojaheaba, lávlagiid duogáš lea gullevašvuohta ja ráhkesvuohta ruovttubáikái. Geassái áiguba soai ovttas Davvi-Norgga ja sámi artistanástejoavkkuiguin salastit Riddu álbmoga ja mátkkoštit singuin ovttas Davvi-Norgga ja Sámi álbmotsillui. Diimmá čavčča álmmuhuvvui «Northern soul, the album», mas dát lávlagat «Hjemmeseier» ja «Filli filli» čuojahuvvojedje eanemusat NRK rádios

Simone ja Herman leaba riegádan ja bajásšaddan Leavnnjas ja Gáivuonas. Duogážis mii jámma gullo sudno dáiddalaš dagus.

– Moai letne nu čeavlát go letne ožžon dan vejolašvuođa ovdanbuktit Northern Soul Riddu Riđđu festiválas dán jagi. Dalle go buvttadeimme dán maid Várjjat festivála lei diŋgon, de lei niehku dán fas oktii álggahit. Ja dál dat dáhpáhuvvá, ja vel ruovttus Riddu Riđus, ja dat gal šaddá duođai stuorisin! Dál lea vuosttas geardde go mii čađahat čájálmasa ná ollu vokalisttaiguin ja artisttaiguin, ja dát dahká dán erenoamážin, dadjaba soai.

Northern Soul álggahuvvui ja lei diŋgojuvvon buvttan Várjjat festiválii jagi 2014. Musihkain, dánsumiin ja filmmain mátkkoštit sii ovttas álbmogiin davvin, nu mo: Guovssahasain, idjabeaivvážiin, čuoikamirkkuiguin, ullosuohkuiguin birra jagi, lagašvuođain ja ráhkesvuođain, ja maiddái garasvuođain ja galbmasiin.

Eará artisttat geat oasálastet Riddu Riđus leat SlinCraze, Petter Carlsen, Kjetil Holmstad-Solberg, Ole Jørn Myklebust, Davvi-Norgga Opera- ja Symfoniijaorkeastar streaŋgakvarteahtta, Halvard Rundberg ja Hogne Rundberg.

– Illudan ovdanbuktit Northern Soul joavkku dán jagáš Riddu álbmogii. Identitehta ja gullevašvuohta leat oasit masa festivála lea huksejuvvon, nu ahte jáhkán čájálmas bures vuhtii váldo, illuda festiválahoavda Karoline Trollvik.