![Kai Mikkel Balto - Årets unge kunstner](/sites/default/files/styles/hero/public/2024-06/nettsak_header_3.png?itok=FPxYsCch)
Nuorra Dáiddár
Dá lea dán jagi nuorra dáiddár Riddu Riđđus
Riddu Riđđu lea nammadan Kai Mikkel Balto (24), Romssas eret, leat «Dán jagi nuorra dáiddár». Balto lea sámi visuálalaš dáiddár guhte dáhttu hástalit árbevirolaš duoji arvedávggálaš ovdanbuktimiiguin ja maiddái guorahallat sámi arvedávggálašvuođa dáiddabarggus bokte.
Kai Mikkel Balto viežžá inspirašuvnna sámi hábmemis ja dat lea boktán sus lasi beroštumi sámi duodjái. Nuorra dáiddár háliida guorahallat ja ovdánahttit iežas dáiddalaš hámi go searvá dán jagi nuorra dáiddárin Riddu Riđđus.
Dán jagi nuorra dáiddár lea Riddu Riđđu taleantaprográmma masa jahkásaččat nammaduvvo nuorra sámi dáiddár ovdanbuktit iežas dáiddalaš bargguid Riddu Riđđu festiválaprográmma bokte ja eará lágidemiin dan jagi main Riddu Riđđu lea miellágideaddji.
Baltos lea bachelor digitála dáidagis ja animašuvnnas Innlanda allaskuvllas, ja lea dál loahpaheame skuvlajagi Sámij åhpadusguodásjis, gos lea oahppame garraduoji. Son háliida guorahallat iežas dáiddalašvuođa seaguhettiin visuálalaš dáidaga ja duoji. Balto mielas lea gelddolaš seaguhit maskuliidna ja feminiidna elemeanttaid vai oalgguhivččii njuovžileappo sohkabealleovdanbuktima sámi hábmema siskkobealde.
“Munnje lea dehálaš oahppat vuđolaš árbevirolaš duddjoma ovdalgo sáhtán geahččaladdagoahtit ja atnigoahtit dáiddalaš friddjavuođa duddjodettiin. Lea leamaš stuora bonusin munnje ahte lea leamaš somá bargat dujiin dáiddahámis ja dat lea addán munnje saji leat hutkái eará ládje go digitálalaš dáidda, dadjá Kai Mikkel.
Juo dán jagi Riddu Riđđus besset guossit buorebut oahpásnuvvat dán jagi nuorra dáiddáriin. Balto váldá oasážiid dáiddabarggustis Riddu-guolbanii ja dáiddárságastallamis besset guossit gullat lasi su dáiddalaš višuvnnain.
Festiválajođiheaddji Sajje Solbakk illuda ođđa nammademiin:
“Kai Mikkel lea gelddolaš ja ođđa namma Sámis. Movt son árvvusatná árbevirolaš duddjoma ja su dáhttu loktet arvedávgehasaid fáddán Sámis dáidaga bokte lei duođai min váimmu guovdu. Eatnašat dáidet dovdat su «daidda.stallu» nammasaš Instagram-konto bokte, muhto dál illudan oaidnit maid son hábme min taleantaprográmmas!”
Oasáš jury ákkastallamis:
"Kai Mikkel lea ođđajurddašeaddji ja gelddolaš nuorra dáiddár gii bargá máŋga dáiddasurggiin. Son bargá earret eará dujiin, bivttashábmemiin ja digitála dáidagiin. Jurya atná erenoamáš árvvus su fágaidrasttildeaddji bargovuogi, juoga mii ii leat nu amas sámi dáiddasuorgái. Árbevirolaš duoji atná Kai Mikkel alla árvvus. Son háliidii vuos oahppat duoji albma lahkai Sámij Åhpadusguovdážis Johkamohkis, ovdal go geahččaladdagođii ja hástališgođii sajáiduvvan norpmaid. Lea nanu givrodat og son lea hui diđolaš dasa ahte duojis leat čálekeahtes njuolggadusat ja seammás duostá hástalit daid. Son geavaha ođđaáigásaš ja árbevirolaš bargovugiid dáidagis mii guoskkaha váimmu. Kai Mikkel Balto háliida hástalit servodaga sohkabealnorpmaid bonju fáttáiguin iežas dáidagis ja duojis. Bonju eamiálbmogat gudnejahttojuvvojit dán jagi davvi álbmogin Riddu Riđus 2024:s, ja danin lea jury:ii erenoamáš dáhpáhus nammadit Kai Mikkel Balto justa dán jagi."
Riddu Riđđu taleantaprográmma
Dán jagi nuorra dáiddár lea Riddu Riđđu taleantaprográmma mii juohke jagi nammada nuorra sámi dáiddára ovdanbuktit su dáiddabargguid Riddu Riđđu festiválaprográmma bokte ja iežá lágidemiin dan jagi, main Riddu Riđđu lea miellágideaddji. Lassin 25.000 ruvdnosaš stipendii siskkilda nammadeapmi maiddái orostallama Lásságámmis, Áillohačča dáiddárviesus. Kai Mikkel Balto álggaha iežas Dán jagi nuorra dáiddár-jagi Riddu Riđđu festiválas dán jagi, ja son joatká doaimma Mihkkal Hætta maŋis.
Talent Norge, Samfunnsløftet ja Sámediggi ruhtadit Dán jagi nuorra dáiddár/Riddu sessions.