Oaguhuvvon ruošša joavku gárvvis Riddu Riđđui
Pussy Riot lea okta dain stuorámus artistaođđasiin dán jagi Riddu Riđus.
- Pussy Riot lea ráhkadan stoarpma miehtá máilmmi, lohká festiválajođiheaddji Sajje Solbakk gii lea erenoamáš duhtavaš go joavku boahtá festiválii.
- Jos it dovdda sin musihka, de dovddat goit sin politihkálaš dáistaleami. Sin garra fámut leat dego sivdniduvvon Riddu lávdái ja dál de viimmat bohtet Olmmáivággái. Gal dát de šaddá áibba erenoamáš vásáhus! lohká Solbakk.
Pussy Riot garra punkrock lea ivdnejuvvon aktivismmain, vuostelastimin ja feminismmai. Dál de bohtet vuosttaš geardde Riddulávdái.
Joavkkus gohčodit iežaset "global feminist protest-art movement:in".
Aktivista ja konseaptalaš artista Nadya Tolokonnikova lea joavkku njunuš ja vuođđudeaddji. Nadya bálkkašuvvon artista gii lea leamaš stuorra musihkkafestiválain ja doaluin miehtá máilmmi. Sus lea maid nanu kuráhtornamma go lea ovdánahttán ja hábmen erenoamáš vásáhusaid Saatchis ja lágidan Sotheby ákšuvnna.
2012:s oaččui Pussy Riot máilbme fuomášumi ja ollu čuovvoleddjiid go Nadya ja guokte joavko miellahtu dubmehalle guovtti jahkái giddagassii Putin-vuostálastima geažil. Gieskat garttai Nadya ođđa ráŋggaštusáššái Ruoššas go čájehii su dáidagiid "Virgin Mary, Please Become a Feminist" ja "Putin's Ashes" Deitch Gallery:s ođđajagimánus 2023. Dál lea son Ruošša "most wanted"-listus. Dat mearkkaša ahte son bidjo giddagassi jos fal iđeš Ruššii. Danin orru dál USA:s.