Ovttasbargá njunuš dáiddáriin festiválaplakáhta hábmemis

Dán jagi Riddu Riđđu festiválaplakáhta lea sámi dáiddár Anders Sunna ráhkadan. 

Festiválajođiheaddji Sajje Solbakk lea ilus go dát bivnnuhis dáiddár mieđai dán dehálaš bargui.

Sunna (riegádan Gironis 1985:s) lea okta dain sámi dálááiggedáiddáriin mii lea áibbas njunnošis, ja vaikko lea oalle nuorra de lea goitge dahkan iežas oainnusin hui ollu arenain, maŋemus go lei okta dain dáiddáriin geat ovddastedje Sámi jagi 2022 Veneziabiennala davviriikalaš paviljoŋŋas.

Anders Sunnas lea čielga politihkalaš dovddasteami dáidagisttis iige dán jagi Riddu-plakáhtta gal das spiehkas. 

Min mielas plakáhtta lea njuolgut jáhkkemeahttun váimmu guovdu, muitala festiválajođiheaddji Sajje Solbakk. Anders Sunna lea ieš ožžon mearridit juste movt hábme dan ja dat lea duođain šaddan visot maid leimmet sávvan, joatká Solbakk.   

Plakáhtta lea ráhkaduvvon stiillas mii doalvu jurdagiid árbevirolaš muorravadjosii ja goitge addá ivdneválljejupmi, motiiva ja grafihkka muđui čielga ođđaáigásaš dovddu.

Plakáhtta lea ráhkaduvvon guovtti hámis, okta mas dievdu lea váldomotiivan ja nubbi mas nisu lea váldomotiivan. Goappaš motiivvat galget geavahuvvot iešguđet ládje festiválaáigge, ja dainna lágiin lea Sunna duođas bidjame iežas dovddaldaga festiválaguvlui.