Riddu Riđđu 2022 vuosttaš artistaalmmuheapmi
Maŋŋá 30-jagi ávvudeami almmuhat mii dál vuosttaš artisttaid boahtte jahkái, seammás go rahpat bileahttavuovdima 100 hálbbiduvvon bileahtain. Maŋŋá dáid ráddjejumiid mat leat leamaš leat mii gergosat fas albma láhkai ávvudit boahtte geasi!
Lido Pimienta fátmmasta iežas afro ja eamiálbmotduogáža musihkain mii hástala fápmodolliid, dat lea sihke stuibmideaddji, čáppat ja nostalgiijalaš oktanaga. Sus lea bearaš sihke Wayuu-álbmogis ja afrokolumbialaš servodagas.
The Halluci Nation, ovddeš A Tribe Called Red, boahtá ruovttoluotta Riddu Riđu lávdái ođđa musihkain. Dát beakkálmas First Nation-joavku Kanadas eret hutkkai electric pow wow-šáŋŋera. Vaikke gos sii čuojahit, de sii ráhkadit eamiálbmotfeastta.
Katarina Barruk lea okta buot eanemus bivnnuhis lávluin Sámis, guhte lea beaggán go ráhkada ođđahutkkálaš musihka mas seaguha juoigama ja ubmisámi teavsttaid. Maŋimuš jagiid lea Barruk čuojahan eanet go 100 konseartta moanat eurohpálaš riikkain ja dainna lihkostuvvan bures. Son lea illudahttán Riddu-gussiid máŋgga háve. Barruka nubbi álbuma lea boađe boađi ja fánsat sáhttet illudit návddašit sihke boares ja ođđa jiellahiid boahtte jagi Riddu Riđđus.
Amoc + Ailu Valle gávnnadeaba fas ovttas Trio Boogiemen live-joavkkuin alvvalaš ráppa- ja lossarockakonsearttas jagi 2022 Riddu Riđđu festiválas.
Sámi artista Elin Kåven ja lávllačálli/musihkkabuvttadeaddji Robin Mortensen Lynch álggaheigga musihkalaš ovttasbargguska jagis 2015. Dán gelddolaš duo musihkka lea doalvvuheaddji seaguhus elektrovnnalaš musihkas mas leat lossa ritmmat ja juoigan. Jagis 2020 bođii vuosttašskearru “Dárjja- Endure” lávlagiiguin sihke eŋgelas- ja sámegillii ja nanu luohtemeriin.
- Mii leat duođas movttidahtton lágidit festivála fas ja leat ilus go sáhttit fállat sihke festiválacampa ja bearašcampa boahtte geasi, dadjá festiválahoavda Sandra Márjá West.
Bileahtat leat vuovdimassii riddu.no:s. Riddu Riđđu lágiduvvo suoidnemánu 13.-17.b. 2022 Gáivuonas.