Riddu Riđđu čájehii “Experience Sápmi” Reeperbahn-festiválas
Riddu Riđđu lea ovttas Hedline Arts:in lágidan historjjá vuosttaš sámi čájeheami Reeperbahn-festiválas Hamburgas dán vahkus.
Reeperbahn festivála lea Eurohpá stuorámus čájáhusfestivála ja lea kontineantta deháleamos lávddiid gaska artisttaide geat háliidit olahit Duiskka ja Eurohpá márkaniid.
Gaskavahkku čakčamánu 18. beaivvi álggii Reeperbahn Hamburgas, Duiskkas, ja bovdii ge čájáheapmái “Experience Sápmi” ovttas Hedline arts:in ja Riddu Riđuin. Čájehemiin besse vásihit sámi gelddoleamos dáiddáriid justa dál: Emil Kárlsena, Niilas ja Katarina Barruk.
Go Emil Kárlsen lávki vuosttaš artistan lávdái, de lei juo báiki bahkka dievva. Geahččit bohte valvin, ja dađe bahát fertejedje máŋggas jorgalit uvssas go eai čahkan eambbosat sisa. "Experience Sámiin” beasaimet čájehit min alladását musihka maid gehččiide geat ledje nu gergosat dan vásihit.
Riddu Riđđu vásiha stuorát dat stuorát beroštumi sámi musihkkii ja oažžu ovttat láhkai jearaldagaid sihke našuvnnalaš ja riikkaidgaskasaš aktevrrain geat háliidit ovttasbargat sámi artisttaiguin. Sámi musihkkalávdi ja suorgi lea nannosit šaddan maŋemuš jagiid, seammás go lea maid šaddan girjái, gos sáhttá válljet viiddes šáŋŋeriid ja artisttaid gaska. Lágidit čájeheami ovtta Eurohpá stuorámus musihkkasuorgefestiválain lea okta daid máŋgga vugiin mainna Riddu Riđđu háliida dustet dan stuorra beroštumi sámi musihkkii.
Čájeheapmi "Experience Sápmi" ii livčče leamaš vejolaš doarjaga haga Norgga ambassadevrras Berlinas, Sámedikkis, Olgoriikadepartemeanttas, Music Norway: ja Export Music Sweden:s. Ollu giitu buot ovttasbargoguimmiide!
Mii háliidit erenoamážit giitit min rámálmas artisttaid, Katarina Barruk, Emil Kárlsen ja Niilasa. Duhát giitu go juogadehpet dáidagiidet minguin!
