Riddu Riđđu lea nammadan dán jagi nuorra dáiddára
Sámegielat slam-poehta Ánná Káisá Partapuoli lea válljejuvvon Riddu Riđđu 2018 nuorra dáiddárin.
Ánná Káisá lea 23 jagi boaris, lea bajásšaddan Skániin ja Sohpparis, muhto ássá dáid áiggiid Romssas gos gazzá lektoroahpu. Son lea čállán divttaid ja lávlagiid olles eallinagi, maŋimuš jagiid lea dovdan ahte háliida vejolašvuođa ovdanbuktit iežas čállosiid ja ovdánahttit ja hábmet sámi girjjálašvuođa.
Festiválahoavda Karoline Trollvik dadjá; «Ánná Káisá Partapuoli lea nuorra girjjálaš taleanta guhte hirpmahuhttá dainna vugiin mo son plassere iežas sámi servodahkii, seammás go observere ja kommentere siskkáldasat servodagas.»
Partapuoli viežžá inspirašuvnna č̌állosiidda sámi eallimis, sámi servodagas ja boazodoalus. Sus leat ollu politihkalaš čállosat maiddá ja sutnje lea dehálaš loktet sámegiela ja erenoamážit duortnussámi suopmana árvvu ja geavaheami. Slam-poehtan háliida son čájehit ahte maiddá sámegielain lea vejolaš čállit riimmaid, ja ahte divttat sáhttet leat illun ja movttiidahttin nuorra sápmelaččaide.
Ohcama ja dáiddalaš buktagiid vuođul lea jury buktán čuovvovaš cealkámuša:
Ánná Káisá Partapuoli lea nuorra girjjálaš taleanta ja son lea erenoamán go lea sámegielat slampoesiija-čálli. Son hirpmahuhttá iežas nana gelbbolašvuođain duortnussámi suopmanis, ja mii jáhkkit son doalvu sámi poesiija boahtteáigái. Son hirpmahuhttá vugiin mo son plassere iežas sámi servodahkii, seammás go observere ja kommentere siskkobealde. Lea duostilis ja roastilis sámi dáiddár gii buktá árjjálaš sániid sámegillii.
Partapuoli lea ilus ja gealdagasas ja dadjá ná bálkkašumi birra; «Nammaduvvot Dán jagi nuorra dáiddárin lea munnje stuorra gudni ja mearkkaša munnje hui ollu. Mun sávan ja jáhkán dát jahki sáhttá rahpat ođđa uvssaid munnje, ja leat jorggáldahkan mu dáiddalaš karriearas. Lean jo bures boahtán johtui ráhkkanemiiguin festiválii, ja illudan sakka sihke geassái ja boahttevaš jahkái!»
Dán jagi nuorra dáiddár nammasaš árvonammadeapmi lea oassi Riddu Riđđu Festivála dáhtus čalmmustahttit nuorra sámi dáiddáriid ja láhčit sidjiide vejolašvuođa ovdánit iežaset attáldagaiguin ja beassat oidnosii riikka ja olgoriikkalaš dásis. Ovttasráđiid ásahusain Kulturnæringsstiftelsen SpareBank 1 Nord-Norge juhkkojuvvo nuorra dáiddárii 25 000 ruvnnu sturrosaš stipeanda. Okta oassin dán nammadeamis lea ahte nuorra dáiddár beassá orrut Lásságámmis.
Partapuoli álggaha iežas jagi nuorra dáiddárin dán jagáš Riddu Riđus, go dánsu Ánna-Katri Helander loahpaha iežas doaimma. Partapuoli ovdanbuktojuvvo festiválas, gos son earret eará oažžu sierra oasi prográmmas masa son ieš vállje hámi ja ovdanbuktinvuogi.
