Riddu Riđđu lea nammadan dán jagi nuorra sámi dáiddačeahpi
Dán jagi 21-jahkásaš nuorra dánssodeaddji Ánna-Katri Helander lea nammaduvvon Riddu Riđđu festivála nuorra dáiddárin. Son riegádii Guovdageidnui ja lea doppe šaddan bajás, muhto lea gieskadaš áiggi orron Oslo-gávpogis, vai sus leat buoret vejolašvuođat ovdánit dánsumis. Son lea dánson dan rájis go 13-jahkásažžan álggii orientála dánsumiiguin. Helander mielastuvai dánsumii vásihettiinis vugiid mo eará nuorra álgoálbmotlaš artisttat seaguhit iežaset kultuvrra osiid dáláš dáiddalaš ovdanbuktimiidda. Su vuohki ja dovddahusat leat nuppástuvvan jagiid vássima mielde, seaguhusvuogi rájis main juoigama estehtalaš oasit ja čoavjespahčamat leat seahká gitta dakkár vuohkái mii eambbo állana sámepolitihkalaš hiphop nammasaš musihka guvlui.
Festivála hoavda Karoline Trollvik dadjá; «Midjiide bohte arvat buorit ohcamušat dán jagi, ja loahpalaš válljejupmái olii Ánna-Katri. Son lea ulbmálaš ođđaáigásaš dánssodeaddji, guhte atná čalmmus áššin sápmelašvuođa sihke dáidaga ja servodaga dáfus. Erenoamáš sáhkkiivuođa mis bokte su álgoálbmotdánsumiid geahčadeamit ja vuohki mo son diktá daid iežas mielastuhttit».
Bealistis Helander dadjá ná árvonammadeami birra: «Dat lea arvonammadeapmi mii munnje ollu mearkkaša. Dánsunsuorggis sáhttá leat dáiddalaččat váttis bargat, ja lossat sáhttá leat nuorra dáiddárin bargat. Dát diehtu movttiidahtii mu meareheamet, ja mun vuorddašan iluin buot vejolašvuođaid maid dát jahki sáhttá buktit munnje!»
Dán jagi nuorra dáiddár nammasaš árvonammadeapmi lea oassi Riddu Riđđu Festivála dáhtus čalmmustahttit nuorra sámi dáiddáriid ja láhčit sidjiide vejolašvuođa ovdánit iežaset attáldagaiguin ja beassat oidnosii riikka ja olgoriikkalaš dásis. Ovttasráđiid ásahusain Kulturnæringsstiftelsen SpareBank 1 Nord-Norge juhkkojuvvo nuorra dáiddárii 25 000 ruvnnu sturrosaš stipeanda. .
Helander áigu álggahit iežas nuorra dáiddár jagi go lea Riddu Riđđu festivála. Dalle son álgá dáiddára Inga-Wiktoria Påve sadjái. Festiválas Helandera beassat bures dovddiidit, go das sus galgá leat sierra prográmma-oassi iežas formáhta ja ovdanbuktima mielde.
