Riddu Riđu ođđa sisdoallobuvttadeaddji

Eurohpá stuorámus eamiálbmotfestivála lea virgádan Stian Pedersen (31), guovttejagáš sisdoallobuvttadeaddji virgái. Gáivuotnalaš Pedersenis lea earenoamáš ovddasvástádus festivála riikkaidgaskasaš doaimmain, ja áigu maiddái bargat festivála mánáid- ja nuoraidáŋgiruššamiiguin Mánáidfestivála ja Riddu Nuorat. Pedersen álggii virgái cuoŋománu 15. beaivvi.

Pedersen lea guhkit áigge leamaš buvttadeaddjin, ja lea ovdal bargan sihke Márkomeanuin ja Riddu Riđus. Son boahtá Riddu Riđđui Hedline - Arctic Arts Management prošeaktajođiheaddji virggis Álttás.

Buorre máhccat
"Lea hui somá leat ruovttoluotta Riddu Riđđus. Boahtit deike lea dego ruoktot boahtin. Festivála lea eahpitkeahttá Norgga eamiálbmotkultuvrra deháleamos lávdi. Dasa lassin lea Riddu Riđđu stuorámus sámi festivála ja dehálaš lávdi sámi artisttaide. Šaddá hui gelddolaš beassat loktet min iežamet sámi artisttaid oidnosii sihke dáppe ruovttus ja olgoriikkas." muitala Pedersen.

Ollu ohccit
"Ollu jagiid lea Riddu Riđđu bargan oahpisin dahkat sámi kultuvrra viidát publikii. Lea hui gelddolaš go mii dál leat dan dilis ahte sáhttit nannet dán barggu ođđa virggiin!

Mis ledje ollu buori ohccit dán virgái, ja mii leat nu ilus go Riddu Riđđu geasuha bargosadjin. Mii eat eahpit ahte Stianis iežas viiddes fierpmádagain ja guhkes hárjánemiin lea dat  buvttadeaddji maid mii dárbbašat. Ja mii leat hui ilus go son lea miehtan dán bargui! " muitala festiválahoavda Sajje Solbakk.