Riđoš Islándda rittus

Jus leat Islánddas skábmamánu 1.-4. beivviid de lea vejolaš vásihit earret eará sámi pop, árbevirolaš juoigama ja elektrovnnalaš musihka dovddus Islándda Airwaves festiválas. Dát lea oassi varas ovttasbarggus Eurohpa stuorámus álgoálbmotfestiválain Riddu Riđđu festiválain, mii lea Olmmáivákkis Davvi-Romssas. Dát guokte festivála ovttasbargaba dán jagi vuosttaš gearddi Arctic Waves dáiddalaš prográmma oktavuođas, mii lea čájálmas mii čájeha ollu musihkkašáŋŋeriid iešguđetge árktalaš guovlluin.

Riddu Riđđu festivála lea eatnašiidda dovddus sámi festivála mii juohke suoidnemánus geasuha čuđiid olbmuid Gáivutnii. Lassin ieš festiválavahkkui lágida Riddu Riđđu doaluid birra jagi, sihke báikkálaččat, nationálalaččat ja riikkaidgaskasaččat. Festivála hálddahus vásiha ahte jearaldagat eará lágideddjiin geat háliidit álggahit gielddalaš ovttasbarggu sakka lassánit, ja ovttasbargu Iceland Airwaves lei bajimusas sávaldagain, muitala festiválahoavda Sajje Solbakk: 

- Riddu Riđđu festivála lea čielgasit rievdamin ja das leat dađistaga eanet birrajagi doaimmat. Mii leat dakkár dilis ahte mii fertet biehttalit máŋga gelddolaš bovdehusa ovttasbargui resursakapasitehta geažil. Arctic Waves lei baicce jearaldat maid eat sáhttán biehttalit. Lea gelddolaš čuovvut mielde movt sámi kultureallin ovdána, ja lea buorre oaidnit ahte jearru sámi dáiddabuvttadeapmái lassána dađistaga. Lean rámis dan sámi sáttagottis mii mis lea fárus Islándii, ja illudan oaidnit olbmuid movtta go besset vásihit sámi musihkas buoremus osiid! -  dadjá Solbakk. 

Guokte konseartta ubmisámi popsensašuvnnain
Bálkkašumi vuoiti Katarina Barruk lea okta Sámi bivnnuheamos vokalisttain, dovddus iežas atmosfearalaš popmusihka geažil mii ovttastahttá juoigama ja ubmisámi teavsttaid. Son lávlu iežas eatnigillii ubmisámegillii, mii lea UNESCO uhkiduvvon gielaid rukseslisttus. Barruk musihkka lea seaguhus pop, árbevirolaš luođis ja improviserejuvvon elemeanttain. Arctic Ways oktavuođas lágida Katarina Barruk konseartta gaskavahku 1.11 ja lávvardaga 4.11.

Spellemann-bálkkašumi vuoiti gearggus Arctic Wavesii
Peder Niilas Tårnesvik lea čalmmustahttán iežas leat okta bivnnuheamos elektrovnnalaš artisttain, ja -buvttadeddjiin Norggas. "Also This Will Change"-skearru vuostáiválde Aftenposten ja Bergens Tidende aviissat buriiguin árvvoštallamiiguin, goappašagat adde 6 bircočalmmi. Dainna skearruin son vuittii maid Spellemann Jagi elektronika. Niilasis lea beallji detáljaide, nugo ii gallis earás, son seaguha šáŋŋeriid, dajahusaid ja musihkalaš dovdduid iežas jietnamáilmmis. Son geavaha gieddebáddemiid, samples, live- ja digitála čuojanasaid, ja oasi iežas sámi duogážis mas šaddá čuoddjás jietnagovva. Niilas čuojaha duorastaga 2.11 ja ávvardaga 4.11 Arctic Waves festiválas.

Odda sámi giellaloktenbálkkašumi 
Emil Kárlsen lea neavttár ja musihkkár eret Omasvuonas Davvi-Romssas. Karlsen ráhkada musihka sámegillii, mas lea erenoamáš jietnagovva maid Sápmi ii leat ovdal vásihan: Jietnagovva maid klassihkalaš streaŋggat leat báidnan, mas lea veaháš alternatiiva country ja jazz ja mat leat niehkoláhkái beassan gárvvuhit geasuheaddji popmelodiijaid ja poehtalaš teavsttaid. Emil Kárlsen lea maid varas vuoiti Sámedikki giellaloktenbálkkašumis 2023. Arctic Waves oktavuođas doallá Emil Kárlsen konseartta bearjadaga 3.11.