Sámi paviljongas Riddu Riđđui
Dáiddároappážagat Gáddjá ja Biret Haarla leigga oassin sámi paviljonga prográmmas Veneziabiennales. Fargga boahtiba Riddu Riđđui áibbas varas dánsunčájálmasain, “Starting from staring”.
Starting from staring atná vuolggasadjin deaivvadeami gaskal eamiálbmoga ja eanetlohkoálbmoga. Guovddážis lea dáistaleapmi luondduriggodagaid ja kultuvrra boasttugeavaheami vuostá, ja čájálmas jearrá mii livččii dáhpáhuvvan jus olbmot eat livčče guođđán luottaid doaimmaideamet maŋis.
Sámi dánsunnásttit
Gáddjá ja Biret Haarla leaba šaddan mearkkašahttit sámi dálááiggedánsumis. Jagis 2021 nammaduvvuiga Dán jagi nuorra dáiddárin Riddu Riđđus ja dán jagi leaba ieža ráhkadan buktaga Riddu Sessions-prošeavttas.
Haarla-oappážagain lea jo guhkes olahuslistu. Dán geasi geargaba Performing Arts Research and Training Studios (P.A.R.T.S) nammasaš skuvllas, mii lea riikkaidgaskasaš dálááiggedánsuma skuvla Brusselis. Soai leaba ovdal studeren baleahta suoma nationálabaleahtas Helssegis. Ovttas leaba doallan čájálmasaid Veneziabiennales ja Helssega biennales, ja leaba ovttasbargan dáiddáriiguin nugo Marja Helanderiin, Outi Pieskiin, Pauliina Feodoroffain ja Mari Boiniin.
Sámi taleantaprográmma
Dán jagi nuorra dáiddár/Riddu Sessions lea sámi taleantaprográmma nuorra dáiddáriidda. Dáiddárat ožžot saji dáiddalaš ahtanuššamii deaivvademiid bokte mentoriiguin, sii ožžot fágalaš čuovvoleami Riddu Riđđu bealis ja šaddet oassin stuora riikkaidgaskasaš ja sámi fierpmádagas. Ovddeš dáiddárat prográmmas leat earet eará leamaš musihkar/dáiddár Emil Kárlsen, dánsejeaddji Ánna Katri Helander, slampoehta Ánná Káisá Partapuoli ja juoigi Marja Mortensson.
Dán jagi nuorra dáiddár 2022 lea mearrasámi duojár Márjá Karlsen, guhte ovdanbuktá barggus geasi festiválas. Guossit besset vásihit su Binnáš vel!-čájáhusas ja sáhttet suinna ovttas duhppet gággása.
“Sámis lea hui ollu hábmennákca, muhto leat unnán vejolašvuođat dáiddalaš ohppui man vuođđun lea sámi kultuvra. Dan dihte lea Riddu Sessions nu dehálaš – ollu nuorra sámi dáiddáriidda lea dá vuosttaš geardde go besset bargat sámi geahččanguovllus ovttas sámi festiválain mas maiddái lea ollu buvttadanvásáhus,” dadjá festiválajođiheaddji Sandra Márjá West.
“Starting from staring” vuosehuvvo Kulturlanjas duorastaga suoidnemánu 14.b. dii 16.00 ja lávvordaga suoidnemánu 16.b. dii 12.00. Čájálmasaide it dárbbaš makkárge sierra bileahta/várrema earágo festiválapássa dahje beaivebileahta.
Riddu Riđđu lágiduvvo suoidnemánu 13.-17.b. Gáivuonas. Festivála fállá artisttaid nugo Angelique Kidjo, The Halluci Nation (ovdal bekkii A Tribe Called Red-namain), Lido Pimienta ja ISÁK. Olles prográmma ja bileahtaid gávnnat dás: riddu.no.