Senjahopen ovddasta «Fávllabeali» dán jagáš Riddu Riđđu-festiválas.

Ráhkkan donge suohtastallat Riddu Riđđus roavasáltemáhku davvinorgalaš lávlunrockáriiguin!

Senjahopen čuojahanjoavku lea huksen alddis nana guoimmuheaddji gova ja olbmot dadjet sin čeahppin lávddi alde. Sii illudahttet stuorábuid ja unnibuid miehtá riikka, nu festiválalávddiin go bahkkadievva klubbainge. Musihkka lea melodalaš gitára rocka mas vuhtto punk- ja cowboyluondu. Teavsttaid sisdoallu lea seaguhus rievvármuitalusain ja máidnasiin beaivválaš eallimis.

Festiválajođiheaddji Karoline Trollvik dáhkida garra leavttu go Senjahopen boahtá Gáivutnii. «Juohke jagi Riddu Riđđu bovde festiválii soames báikkálaš davvinorgalaš bánda. Min mielas Senjahopen lea albma showjoavku mii áibbas sihkkarit buktá čuojahemiin eallima ja jođu! Mii guldaleaddjit beassat illudit ealas gáiggáiguin, go sii lávlot olbmuin ja sin guollebivddus, eallimis ja jápmimis, ávvudemiin ja árgabeaivvis, sii lávlot «fávllabeali» eallimis nugo fal doppe sáhttá leat», dadjá festiválajođiheaddji.

Senjahopen čuojaha lávvardateahkeda dán jagi Riddu Riđđu- festiválas, mii dán vuoru šaddá suoidnemánu 8:át beaivvis gitta 12:át beaivái.