ISÁK joavku luittii nuppi studioálbuma “Roasut” ođđajagimánus diibmá ja guossohedje bávki konseartta festivála Riddu Nuorat-nuoraidprográmma oasseváldiide jagis 2021. Dán geasi máhccá bivnnuhis trio Gáivutnii, gergosat addit Riddu-gussiide šovva maid eai jur dakkaviđe vajálduhte. Beaggán leage ahte ISÁK addá lávdeovdanbuktima mii lea buoremus luohkás ja mas lea ravddahis energiijadássi. Musihkka ovttasta juoigama ja urbána syntha lyrihkalaš sáttasániin mii gaskkustuvvo sihke sáme- ja eŋgelasgillii.