Artisttas Kalle Urheim leat ruohttasat Divtasvuonas ja Jåhkåmåhkkes. Su áidnalunddot ja liegga, sevdnjes jietna doalvu jurdagiid Leonard Cohenii. Ovttas joavkkuinis ráhkada son miellalágas jietnagova mas sakrala nuohttat ja geasuheaddji ritmmat. Son seaguha elemeanttaid rock, jazz, pop, EDM ja luođis julevsámi teavsttaiguin.

Su skearru “Ruodjo” oaččui 6-eš birccu Avisa Nordlandas. Diibmá gáli son ođđa musihkalaš luotta EP:n “Luksa/Eastbound” ja dán geasi boahtá Riddu Riđđui.