Álggu geahčen jagi 2023 almmuhii sámi girječálli, duojár ja dáiddár Fredrik Prost girjji Leŋges hearggi, Sáhčal fatnasa.

Girjji birra dadjá Prost: “Munnje lei hui dehálaš čállit dán girjji danne go jáhkán ahte mii dárbbašit máhccat ruovttoluotta min vuoiŋŋalaš ruohttasiidda. Eat mii dárbbaš dušše suodjalit eanaguovlluid, dat gáibiduvvo mis, ii dušše fysalaš duohtavuođas, muhto maiddái vuoiŋŋalaš dásis. Min árbevirolaš vuoiŋŋalašvuohta čatná min eanaguovlluide ja dahká eamiálbmotperspektiivva erenoamážin. Go mun álggahin mátkán sullii guoktelogi jagi áigi, de livččen dárbbašan dákkár girjji.”

Prostas lea viiddis beroštupmi sámi rumbbuide ja daid historjái, mii lea dahkan ahte son lea doahttaluvvon rumboráhkadeaddji Sámis. Su girji addá lohkkái ipmárdusa rumbbu historjjás ja dan guovddáš sajis sámi máilmmigovas ja  olbmuid ja luonddu oktavuođas.

Fredrik Prosta birra:

Fredrik Prost lea Sámi duojár ja dáiddár eret Viikusjávrris ruoŧabeale Sámis. Prost orru ja bargá dál  Gironis, ja lea bajásšaddan boazosámebearrašis čeahpes sámi duojáriiguin geat movttiidahtte ja oahpahedje su duddjot oahpain mii lei čuvvon buolvvaid mielde.

Su barggut leat čájehuvvon stuora galleriijain máŋgga sajis máilmmis, nugo National Gallery of Canada ja Stockholmmas Liljevalchs dáiddagalleriijas, ja su dáidda lea maiddái čájehuvvon máŋgga sajis Sámis ja Skandinávias. Son lea ožžon máŋga allaárvosaš bálkkašumi dego Asa Kitok-bálkkašumi Johkamohke dálvemárkaniin 2016:s.

Maŋemus logi jagiid lea Prost bargan viidát sámi noaiderumbbuin ovddidit sámi vuoiŋŋalaš máhtu. Sus lea leamaš guovddáš rolla sámi meavrresgáriid oahpaheamis ja árbevirolaš sámi meavrresgári (rumbbu) ráhkadan teknihkaid seailluheamis, ja árvvoštallamis dan relevánssas dáláš Sámis. 

Niillas Holmberg jođiha ságastallama.

Dát ságastallan lea davvisámegillii ja lágiduvvo ovttasbargguin Sámi girječálliservviin. Mii fállat dulkoma dárogillii.