Riddu Riđđu Festivàla lea riikkaidgaskasaš álgoálbmotfestivála, mii lágiduvvo jahkásaččat Olmmáivákkis Gáivuona suohkanis Davvi-Romssas. Riddu Riđđu lea fargga 32 jagi áŋgiruššan hukset nannoseabbo sámi dihtomielalašvuođa ja rámisvuođa. Festivála lea dađistaga sturron ja lea šaddan mávssolaš ja dehálaš oassi sámi kulturloktemis mearrasámi guovlluin. Festiválas lea riikkaidgaskasaš álgoálbmotprofiila ja oaččui 2009:s nationála guovddášfestiválastáhtusa. Festivála lágiduvvo olgun, ja fállá prográmma olles bearrašii.

Gáivuotna 1991:

Muhtun nuorat čoahkkanit bassindoaluide. Sii ságastallet identitehta ja iežaset ruohttasiid birra. Manne adno sámevuohta heahpadin? Manne eai huma min sámi duogáža birra, vaikko sámegiella lei min áhkuid ja ádjáid eatnigiella?

Nuorat dovde ahte sii eai sáhte šat joatkit eallimis čihkkon identitehtain, ja mearridedje baicca rámisvuođain guoddit iežaset mearrasámi duogáža. Musihka ja kultuvrra bokte sii háliidedje jorgalahttit heahpatvuođa rámisvuhtii. Dainna lágiin vuolggahuvvui Riddu Riđđu festivála.

Nuorat šadde vásihit olu vuostálastima. Sámi luoddagalbbat báhččoje, nuorat geat barge festivála ovddas šadde bogostahkan, sin ala čolge ja njorre vuollaga. Bearrašat juohkásedje danne go muhtun bearašlahtut dohkkehedje iežaset sámi duogáža, ja earát fas biehttaledje.

Muhto nuorat eai vuollánan, ja festivála stuorui ja viidánii. Vuostálastin sámevuhtii unnui ja bovttii unnit ja unnit suhtu. Báikkálaš olbmot, eiseválddit ja artistat dorjo ja dohkkehedje. Eambbogat gárvodišgohte gávttiiguin ja oahppagohte sámegiela. 2009:s olaheimmet maiddái nationála dohkkeheami go Riddu Riđđu, okta dain 12 festiválas Norggas, oaččui guovddášfestivála stáhtusa, mii mearkkaša ahte das lea fásta poasta stáhtabušeahtas.

Háliidat go diehtit eambbo? Loga eambbo DÁS.

Odne leat Riddu Riđđus 4 bistevaš bargi, ja bargoveahka mas leat 120 olbmo geat birra jagi doaimmahit nana bargguid dego plánet, ráhkkanit ja čađahit festivála.

Birrasiid 150 olbmo barget eaktodáhtolaččat festiválabotta. Lassin sierra festiválaprográmmii suoidnemánus mii bargat ulbmillaččat sámi dáidaga ja kultuvrra ovddidemiin iešguđetlágán lávddiin sihke siskkobealde ja olggobealde riikka birra jagi.

Riddu Riđđu Festivála AS ásahuvvui 1.1.2010 ja dan rájes lea das leamaš ovddasvástádus Riddu Riđđu Festivála doaimmaheamis. Riddu Riđđu Searvi eaiggáda Riddu Riđđu Festivála AS 100%. Eanas miellahtut lea festivála bargoveagas. Fitnodagas lea dušše okta oasusluohkká, ja das ii leat dienas ulbmilin.

Fitnodaga ulbmil:

• Riddu Riđđu Festivála AS čalmmustahttá ja ovddida mearrasámi kultuvrra sihke siskkáldasat ja deaivvadettiin eará kultuvrraiguin.  
• Riddu Riđđu Festivála AS galgá ovddidit gudnejahttima ja gierdevašvuođa, ilu ja gelddolaš jurdaga. 
• Riddu Riđđu Festivála AS galgá hukset rámisvuođa sihke Gáivutnii, Davvi-Romsii, Sápmái ja máilmmi álgoálbmogiidda.
• Min guovddášárvvut leat: Fátmmastahtti, Hutkkálašvuohta, Diehtomielalašvuohta. Báikkálaš čanastat – máilmmiviidosaš čuvgejupmi

RRFAS stivrras leat:

• Bente Ovedie Skogvang, stivrajođiheaddji (Riddu Riđđu ovddasteaddji)
• Maria Løkvoll (Riddu Riđđu ovddasteaddji)
• Mats Roar Sakshaug (Riddu Riđđu ovddasteaddji)
• Ørjan Bertelsen (Riddu Riđđu ovddasteaddji)
• Kristin Bjørn (Romssa Fylkasuohkana ovddasteaddji)
• Inga Lillevoll (Sámedikki ovddasteaddji)
• Jens Kristian Nilsen (Gáivuona suohkana ovddasteaddji)