Dieđut

Panorama

 

Ovdagihtii-dieđiheapmi

Festiválapássain beasat oassálastit buot lágidemiin, muhto muhtimiidda fertet dieđihit ovddalgihtii: 

  • Mánáidfestivála, dieđiheapmi rahpasa geassemánu 1.b. 2020
  • Nuoraidprográmma, dieđiheapmi rahpasa cuoŋománu 1.b. 2020. 

Yurtakonsearttaide, deadjaseremoniijaide, filmmaide, semináraide ja čájáhusaide ii dárbbat várret sierra bileahtaid jus eará ii leat dieđihuvvon, muhto boađe buori áiggis vai oaččut saji.

 

 

 

Riššu:

Davvi álbmogiid guovddáža geallirgearddis lea vejolašvuohta riššudit. 

  • Gaskavahku - lávvordaga: bie. 17:00-21:00.
  • Sotnabeaivvi: bie. 10:00-14:00. 

Riššubileahtta máksá 20 kr/Vipps. Muitte fal ruđa váldit mielde.

Biebmu: 

Festiválabáikkis lea vejolašvuohta oastit biepmu eanáš áigge jándoris. Vuollin 2 km geahčen Lávkgiettis leat guokte gávppi.

Giehtabáddi: 

Dušše sii geain lea festiválagiehtabáddi besset sisa festiválabáikái. Dát guoská gait beivviide earret gaskavahku veaiggi. Giehtabáddi lea persovnnalaš, ja dan oažžu go oastá beaivelihpu, vahkkoloahpapássa dehe festiválapássa.

  • Festiválabáikái bie. 24.00 rájes: 15 jagi ahkerádji
  • Vuollaga ja viinna vuovdinbáikái: 18 jagi ahkerádji
  • Festiválaorohahkii: 18 jagi ahkerádji
  • Bearašorohahkii: ii leat ahkerádji
Maksin: 

Festiválas sáhtát máksit sihke koarttain ja ruđain.  

Doaibmahehttejuvvon olbmot: 

Rullastuollogeavaheddjiid mii ávžžuhit váldit mielde mieđušteaddji dasgo rullastuoluin sáhttá leat váttis johttit festiválaguovllus. Suohkanlaš mieđušteaddjiduođaštus dohkkehuvvo. Davviálbmogiid guovddážis leat doaibmahehttejuvvon olbmuide heivehuvvon hivssegat.

Eallit - viessoeallit:

Festiválii ii leat lohpi váldit mielde elliid/viessoelliid.

Min birasjulggaštus:

Riddu Riđđu Festivála lei okta dain vuosttaš festiválain Norggas mii sertifiserejuvvui birasčuovgadoardnan (2004). Dál leat sertifiserejuvvon ođđasit ja leat bidjan mihttun šaddat Norgga buoremus festivála birrasa dáfus- ja mii sávvat ahte DON sáhtát veahkehit min dainna.

Min birasjulggaštus:

"Riddu Riđđu Festiválas lea mihttun leat okta dain eanemus birasseasti festiválain Norggas. Mii galgat váldit ovddasvástádusa birrajagi mo min doaibma váikkuha birrasii báikkálaččat, nationálalaččat ja riikkaidgaskasaččat. Mii galgat bargat joatkevaččat buoridit iežamet birasáŋgiruššama, ja biras galgá álo leat guovddážis sisaoastimiid, buvttadeami ja doapparhálddašeami oktavuođas. Riddu Riđđu Festivála galgá doahttalit buot DBS/HMS-gáibádusaid mat bohtet eiseválddiin.

Olles festiválas lea fokus birrasii ja hálddahus čuovvulahttá dan jeavddalaččat mihtuid, plánaid ja raporteremiid bokte. Min birasbarggut galget movttiidahttit eará lágideddjiid, ovddasbargoguimmiid ja min gussiid. Mii galgat dahkat dán álkes doaibmabijuiguin nu ahte juohkehaš sáhttá searvat áŋgiruššamii. Miehtá jagi galgat mii leat buorrin ovdagovvan min kantuvrasearvevuođas, mii sirret ruskkaid, geavahat nu unnán báhpára go vejolaš, mis lea buorre DBS/HMS-profiila ja oastit nu unnán dárbbašmeahttun gálvvuid go vejolaš."

Mii háliidat čájehit servodatovddasvástádusa dan bokte ahte leat dihtomielalaččat mo festivála váikkuha olbmuide, báikegottiide ja birrasii. Mii buoridat festivála ruskasirrema juohke jagi ja mii oastit eanet ahte eanet birassertifiserejuvvon gálvvuid. Go lea vejolaš de gávppašat báikkálaččat, ja geavahat biepmuid mat bohtet lagašguovlluin nu ollu go lea vejolaš. Festiválaguossit ávžžuhuvvojit sirret iežaset ruskkaid ja geavahit kollektiivasáhtuid dahje mátkkoštit searválagaid biillaiguin festiválii. Mis lea birasdiva biilabisánansajis. Buot bargit, nuoraidbargit ja eaktodáhtolaččat ožžot máhcastankohpa mainna fidnejit nuvttá káfe. Máhcastankohpat leat ráhkaduvvon sohkarrevrriin.

Festiválaguossit sáhttet oastit termoskohpaid mat leat bámbbus ráhkaduvvon, dainna fidnejit nuvttá káfe festiválas. Dát doaibmabidju lea biddjon johtui garvin dihte báberkohpageavaheami. Mii eat vuovdde bohtalčázi ja mis lea buhtes, nuvttá čáhci buot min čáhcepoasttain. Deavdde iežat bohtala dahje oastte Riddu Riđđu bohtala min buvddas!

Mii eat vuovdde Coca-Cola festiválas. Lea dihtomielalaš mearrádus cuiggodit ahte Coca-Cola Company privatisere čázi, ja mo dat áitá eamiálbmogiid vejolašvuođa buhtes juhkančáhcái. Festiválagussiide guossohuvvo biebmu lihtiin mat leat ráhkaduvvon pálbmalasttain, ja boradanneavvuin main sáhttá 100% komposteret. Geavahuvvojit maiddá dušše ovttahávášdávvirat maid sáhttá komposteret go bargit ja eaktodáhtolaččat guossohuvvojit. Bargiid niesttit eai páhkkejuvvo plastihka sisa, muhto báberbussiide. Birasseasti oanehissoajatbáiddit ja báiddit leat maiddái vuovdimassii buvddas. Ale geavat ovttahávášgrilla go kohkket. Lea lohpi dolastallat buot gohttenbáikkiin nu guhká go jurddašat iežat ja ránnjáid sihkkarvuođa birra!

Mis leat diehtojuohkingalbbat maid geavahat juohke jagi, ja mii garvit čáliheamis báhpáriid. Mii leat ásahan festiválaguovddáža mii galgá eastadit ahte divrras ja dehálaš dávvirat jávket.

Go plánet artisttaid ja gussiid sáhtostallama bures de eat dárbbaš vuodjit Romssa ja Olmmáivákki gaskka nu dávjá. Festiválas lea buorre ovttasbargu Avfallsservice AS:in, mii veahkeha gelbbolašvuođainis mo galgat gieđahallat ruskkaid festiválas ja festivála maŋŋá. 2019:s lei Luonddugáhttensearvi festiválas kárten dihte min birasbarggu festiválas. Sis ledje iežaset birasbargit festiválas geat juhke dieđuid festiválagussiide ruskagieđahallama birra.

Dasa lassin lea Riddu Riđđu miellahttun Visit Lyngenfjordas mii lea sertifiserejuvvon ceavzilis mátkebáikin. Loga eanet ortnega birra dáppe.

Festiválaguovlu:
Govva