Jiellatjoavku Felgen Orkester boahtá Riddu Riđđui
Felgen Orkester, geat áiddo leat luoitán ođđa skearru, bohtet Riddu Riđđui dán geasi. Sii bohtet dalle A Tribe Called Red sadjái, geat leat ferten maŋidit iežaset mátkki Sápmái 2022:i.
Felgen Orkester almmuhii skearru Čuđit guovvamánus. Kárášjohjoavkku njealját skearru lea eanet politihkalaš ja penšuvnnalaš go sin ovddit skearrut. Festiválajođiheaddji Sandra Márjá West lea duđavaš bookingain: “Mun liikon Felgen Orkestera ođđa šuoŋa. Sii leat doalahan dan buori miellalági iežaset musihkas muhto seammás ovdánan temáhtalaččat politihkalaš ja persovnnalaš guvlui. Dieđán ahte Felgen Orkester leamašan dehálaš nuorra mearrasápmelaččaid sámevuhti”
A Tribe Called Red livčče galgan čuojahit dán geasi festiválas, muhto karantenanjuolggadusat dahket mátkki Kanadas Norgii váttisin. Bivnnuhis kanadalaš eamiálbmotjoavkku konsearta lea sirdon Riddu Riđđui 2022, ja dalle bohtet iežaset ođđa namain The Halluci Nation.
-Dieđusge lea ahkit maŋidit dán konseartta, muhto nu lea máilbmi dál ja mii fertet beare dása heivehit buoremus lági mielde, dadjá festiválajođiheaddji.
Dán geasi šaddá čielga sámi lineup go ISÁK, Amoc + Ailu Valle, Katarina Barruk, Gájanas ja Emil Kárlsen Lávrin ja ustibiiguin čuojahit Riddu Riđđus.